Fariz Əhmədov Cəfər Cabbarlı adına “Azərbaycanfilm” kinostudiyasına direktor təyin edilib.
Mədəniyyət nazirinin birinci müavini, Mədəniyyət nazirinin vəzifələrini müvəqqəti icra edən Anar Kərimov əmr imzalayıb.
Fariz Əhmədov 15 dekabr 1983-cü ildə Bakıda anadan olub. ADMİU-nun Ədəbi yaradıcılıq və ekran dramaturgiyası ixtisasında (2001-2005) və Rüstəm İbrahimbəyovun Beynəlxalq Kino Məktəbində təhsil alıb (2007-dən).
Professional Kinorejissorlar Gildiyasında koordinator (2003-2005), Beynəlxalq Audiovizual Festivalda koordinator (2003-2005), ANS və AZTV -də rejissor kimi çalışıb.
Fariz Əhmədov “Kiçik Əmanət” (2005, 5 dəq, film haqqında film), UNICEF üçün “Gənclik və Sülh” mövzusunda 1 dəqiqəlik sənədli filmin (2003) müəllifidir.
2010-cu ildə Ümumrusiya Dövlət Kinematoqrafiya Universitetinə daxil olmuş və 2012-ci ildə həmin ali təhsil ocağının magistr pilləsini bitirmişdir.
2012-ci ildə “Azanfilm” animasiya filmləri studiyasının direktoru təyin edilmişdir.
Çəkdiyi “Əriyən ada” filmi 2015-ci ildə “Ən yaxşı sənədli film” nominasiyasında “Qızıl Pəri” mükafatına layiq görülmüşdür.
Qeyd edək ki, bu təyinata qədər Nazim Hüseynov “Azərbaycanfilm” kinostudiyasının direktoru vəzifəsini icra edirdi.
07.10.2020