Dekabrın 18-də Azərbaycan Dövlət Film Fondu və Azərbaycan Kinematoqrafçılar İttifaqının təşkilatçılığı ilə görkəmli kinorejissor Kamil Rüstəmbəyovun 100 illik yubileyi münasibətilə xatirə gecəsi keçirildi. Film Fondunda keçirilən tədbir çərçivəsində sənətkarın həyat və yaradıcılığını özündə əks etdirən fotosərginin açılışı oldu.
Xatirə gecəsini giriş sözü ilə tədbirin aparıcısı, Azərbaycan Dövlət Film Fondunun direktoru, Əməkdar incəsənət xadimi Cəmil Quliyev açaraq, Kamil Rüstəmbəyovun şəxsiyyətini məşhur kino və televiziya xadimlərinin fikirləri əsasında tamaşaçılara təqdim etdi. Sonra Azərbaycan Kinematoqrafçılar İttifaqının sədri, Xalq artisti Rasim Balayev, Xalq artistləri Əbdül Mahmudov, Ramiz Həsənoğlu, Əməkdar incəsənət xadimləri Ayaz Salayev, Oqtay Babazadə, Əməkdar artist Əliqulu Səmədov tanınmış rejissor haqqında fikirlərini bölüşdülər.
Tədbir boyu sənətkarın həyat və yaradıcılığını özündə əks etdirən videoçarx və rejissorun çəkdiyi filmlərdən fraqmentlər nümayiş etdirildi.
