Kinorejissor Rüfət Əsədov 65 yaşını qeyd edir. Dövlət Film Fondunun əməkdaşları və kinosevərlər adından Rüfət müəllimi ürəkdən təbrik edir, işlərində nailiyyətlər arzulayırıq.
Rüfət Əsədov 1960-cı il avqustun 30-da Naxçıvanda doğulub. Leninqrad Texnoloji Universitetində və “Lenfilm”in nəzdindəki Kino Məktəbində təhsil alıb. 1999-cu ildə amerikalı prodüser O.Harençarın rəhbərlik etdiyi “Sənədli filmlərin istehsalı” kurslarının dinləyicisi olub, 2000-ci ildə ABŞ-nin Kaliforniya ştatının San-Fransisko şəhərində yerləşən “Promatheus Production” kinostudiyasında təcrübə keçib.
Rejissor Leninqradda (indiki Sankt-Peterburq) və Azərbaycan Televiziyasında bir sıra sənədli filmlər lentə alıb. “Vahimə” qısametrajlı filmi onun bədii kinoda rejissor kimi debütüdür. Film bir çox mükafatlara layiq görülüb.
Bundan sonra “Neftçi” (1999), “Sonrakı peşmançılıq” (1999), “Antropoloji sənəd” (2001), “Ümidlərin sınağı” (2004), “Arxada qalmış gələcək” (2004), “Azərbaycana xoş gəlmisiniz” (2006), “Sərhəd müstəqillikdir” (2007), “Yeni əsrin şəhəri” (2008), “Kənddə sonuncu yəhudi” (2016) və digər filmlərə quruluş verib.
“Arxada qalmış gələcək” tammetrajlı bədii filmi R.Əsədovun yaradıcılığında mühüm yer tutub. Fantastik-realizm janrında lentə alınan film Qarabağ müharibəsi mövzusuna həsr olunub.
Rejissorun “Kənddə sonuncu yəhudi” sənədli filmi İsrailin Afula şəhərində keçirilmiş Near Nazaret Film Festivalında nümayiş olunub, festivalın iki diplomuna layiq görülüb. Diplomun biri məhz xalqlar arasında anlaşma və dostluğun möhkəmlənməsinə görə verilib. Ümumiyyətlə, R.Əsədov dağ yəhudiləri haqqında 3 sənədli filmin (“Quba yəhudiləri”, “Kənddə sonuncu yəhudi” və “Peyğəmbər Yereminin göz yaşları”) müəllifidir. Bu filmlər dəfələrlə İsraildə, Avropada və ABŞ-də müxtəlif kinofestivallarda və tədbirlərdə nümayiş etdirilib, mükafatlar alıb.
R.Əsədov həmçinin “Markovka”, “Qeybdən gələn səs”, “Qobustan”, “Ömürdən uzun gecə” filmlərində ikinci rejissor kimi işləmişdir. Bir sıra reklam çarxları və kliplər hazırlamışdır. Aktyor kimi “Markovka”, “Yarasa”, “Beşmərtəbəli evin altıncı mərtəbəsi”, “Arxada qalmış gələcək”, “Peşəkar”, “Ərazi” filmlərində kiçikplanlı rollarda çəkilmişdir.
Dövlət Film Fondu